Очигледно просторот за манипулација на јавноста по двата терористички напада во Скопје, кај ТЦ "Мавровка" и во близина на просториите на Македонските телекомуникации, е скусен. Тој не остави време за прилагодување на македонската полиција, бидејќи настаните го притискаат МВР. Затоа министерот Костов остро реагираше и оцени дека треба да се прави разлика меѓу терористичките акции и обичните кражби, ограбувања што се секојдневна слика во Тетовско, во Кумановско и во други делови во земјава. Но, министерот заборава дека без разлика на формата на загрозување на јавниот ред и мир станува збор за безбедноста која никако да се стави под контрола. Таа и натаму е првиот услов за стабилизација и посериозно приближување на Република Македонија кон евроатланските интеграциони процеси.

Двете разорни експлозивни и предупредувачки направи што експлодираа во центарот на Скопје, имајќи ги предвид локациите каде што беа поставени, институциите и средствата, за македонската полиција претставуваат класичен пример на терористички акт.

Начинот на поставувањето, видот, но и времето на експлозијата упатува на заклучокот дека и во двата случаја станува збор за терористичка група или дел од терористичка група која на кој било начин има тесна врска со настаните во Куманово и Кумановско. На крајот, не ја исклучуваме можноста дека ваков настан во иднина нема да ни се повтори, изјави министерот за внатрешни работи Хари Костов.

Според него полицијата го прегледува и истражува снимениот материјал од камерите поставени на зградите на "Македонски телекомуникации" и на "Мобимак", од кои, наводно, добила расположливи податоци за тоа кој би можел да биде подметнувачот на експлозивот.

Во МВР се врши анализирање и идентификување на неколкумина сомнителни лица кои во тој момент минувале околу објектите каде што биле поставени бомбите, посочи министерот Костов.

Инаку, краткиот биланс од експлозиите во кој се вели дека едно лице е полесно повредено, а причинета е поголема материјална штета, не потсетува на сериозноста на настаните. Двете експлозии што се случија околу 19,20 часот, на 22 овој месец, со временско растојание од околу две минути, го потресоа централното подрачје на Скопје и ги вознемирија граѓаните потсетувајќи ги на урбаните терористички акции од 2001 година.

Првичните полициски информации велат дека едната експлозија се случила на булеварот "Крсте Мисирков", пред трговскиот центар "Мавровка", наспроти влезот на универзитетот "Св. Кирил и Методиј". Експлозивната направа, за која во Полицијата тврдат дека се во тек вештачења со кои ќе се утврди видот и составот на експлозивот, била поставена во контејнер.

Другата експлозија се случила на улицата "Орце Николов", пред управните згради на "Мобимак" и на "Македонски телекомуникации", во центарот на Скопје. На местото на експлозиите увид извршиле припадници на Единицата за антитероризам во МВР, а полицијата презела мерки и активности за откривање на сторителите и мотивите за поставување на експлозивните направи. Според полицијата во двата случаја се утврдило дека станува збор за два вида различни експлозива. Во првиот случај, кај ТЦ "Мавровка" бил употребен пластичен експлозив, од втората група експлозиви, додека, пак, кај "Македонски телекомуникации" бил употребен ТНТ.

Експлозијата кај "Мавровка", според сите досега прибрани податоци како доказен материјал, била предизвикана од околу еден килограм пластичен експлозив, а втората била од помал интензитет, од помало количество ТНТ.

Министерот Костов, во врска со овие настани, потенцираше дека имало два вида криминогени активности, едните биле терористички, кои ги поврза со бомбите од пред гимназијата и онаа пред трговскиот центар во Куманово, потоа бомбата поставена пред судот во Струга и мините кај Сопот и Ваксинце. Додека пак другите биле криминални, како што биле оние во Тетово и Тетовско, при што цел на напади биле семејства, златари, менувачници.

Министерот Костов оцени дека сите досегашни терористички настани се расветлени. Тој потенцираше дека освен подметнувачите на мината кај караулата Стража, кога загина војник на АРМ, сите други терористи се или осудени или против нив се води судски процес.

Во контекст на последните настани во скопско, Костов меѓу другото информираше дека МВР имало резервен план за акција кога вооружена толпа нападна новинари и упадна во полициската станица во Арачиново.

Сега нема да кажувам што се МВР имаше обезбедено како резерва и каков план имаше. Неделава ќе поднесеме кривични пријави за нападот врз новинарите и пријави против сите кои упаднале во полициската станица. Очекуваме со обвинителството да почнеме со приведување, најави првиот човек на македонската полиција.

Во меѓувреме сите весници и медиуми во Република Македонија направија мала ретроспектива на терористичките акции во земјава. На 27 декември 2002 година од експлозија на бомба пред кумановската гимназија загина случаен минувач. Само среќата ги спаси 500 -те средношколци кои требаа да излезат надвор. На 11 февруари 2003 година, голема и разорна подметната бомба уништи дел од зградата на Основниот суд во Струга.

На 4 март 2003 година двајца војници од НАТО - мисијата "Сојузничка хармонија" и двајца цивили загинаа кога воениот џип нагази противтенковска мина кај Сопот, Кумановско. На 12 јуни 2003 година експлодира подметната бомба во трговскиот центар во Куманово. Таа предизвика поголема материјална штета. На 17 јуни 2003 година загина војник на АРМ, а капетан беше ранет кога нивното теренско возило нагази противтенковска мина на патот кон караулата "Стража" кај Ваксинце, Кумановско. И на крајот кој сигурно нема тука да биде завршен, бидејќи министерот Костов оцени дека очекува да продолжат терористичките напади на 23 јуни 2003 година, речиси во истовреме експлодираа експлозивни направи пред зградата на "Македонски телекомуникации" и пред трговскиот центар "Мавровка" во центарот на Скопје, при што едно лице е полесно повредено. Списокот засега е толку, но најверојатно ќе биде проширен, бидејќи причините за нивното сузбивање не се остранети. Напртотив тие се зголемуваат и затоа резултатите и последиците се мошне негативни за обичните граѓани во Република Македонија. Оттаму тие треба да се подготват на секаков вид тероризам, вклучувајќи го и урбаниот чии манифестации во 2001 година беа евидентни. Затоа не мора да не тешат дека ситуацијата е под контрола туку мора да веруваме на реалноста, а таа не предупредува дека безбедносната ситуација во РМ ни малку не е подобрена. Две години по меѓунационалниот конфликт состојбата во земјава и натаму е лоша. Таа и натаму забрзано паѓа и никој не знае кога ќе се подобри. Полицијата се уште не може да ги контролира загрозените подрачја во Тетовско и во Кумановско. Таму царуваат криминалните банди кои често пати се поддржувани од екстремни албански полтички елементи кои се обидуваат да го разнишаат државниот системот на земјава кој е во "ногдаун" и не може да се освести. Затоа мерките што се преземаат на ова поле не даваат резултати, а тоа го користат бандитите и терористите кои се користат со кукавички методи за да постигнат одредени ефективни политички резултати.