Како што истакнаа челникот на "Космофон", главниот извршен директор Николаос Авгеринос, визијата на новиот мобилен оператор на македонскиот пазар е да ги направи мобилните услуги достапни за сите преку стратегија ориентирана кон корисниците, како и преку конкурентни понуди. Со започнувањето со работа "Космофон" има за цел да го предводи растежот на локалниот телекомуникациски пазар и да им понуди на корисниците висококвалитетни услуги.

На почетокот се нудат два типа пакети - при пејд со телефони Нокиа и Сименс А50 чии најзначајни предности се конкурентни тарифи, наплата по секунда, директна 12 месечна конекција без дополнување на сметката и исти тарифи за повици во Космофон мрежата и надвор од неа. Исто така, и за пост пејд понудите се вклучуваат конкурентни тарифи со наплата по секунда, дополнителни услуги без месечна претплата итн.

При пејд услугите се нудат со бесплатно почетно време од 900 денари, при што цената на првиот пакет е 9.990 денари, а на вториот 5.490 денари. Почетниот ваучер ќе трае една година. Истовремено, ќе може да се купи и само СИМ-картичка која, со бесплатно почетно време од 600 денари, ќе чини 1.490 денари. Кај овој тарифен модел постои скапа (0,36 денари секунда) и евтина тарифа (0,24 денари), но исто така е идентична за разговори во истата мрежа или со мрежата на другиот мобилен оператор или на фиксниот оператор. За првпат во Македонија тарифирањето на разговорите ќе биде во секунди, при што има различни цени за една секунда, зависно од времетраењето на разговорите во текот на месецот, односно колку повеќе сообраќај се остварува, цените се намалуваат.

Пост пејд понудата е сведена на два тарифни пакети, "космофон класик" и "космофон бизнис". Месечната претплата во "класик", кој е наменет за широка потрошувачка, изнесува 375 денари, каде што доколку во текот на месецот се остварат разговори до еден час, цената за секоја секунда е 0,36 денари, за разговори до два часа - 0,30 денари, до три часа е 0,24 денари секунда, а над тоа време секундата ќе чини 0,21 денар. Притоа, кај овој оператор во овој тарифен модел нема скапа и евтина тарифа, цените се исти, без разлика дали се зборува во рамките на мрежата на "Космофон" или, пак, кон фиксен телефон или кон мрежата на "Мобимак". Кусите пораки ќе бидат со цена од 4,78 денари, а бесплатни ќе бидат многу дополнителни услуги. Така, нема да се плаќа никаква приклучна такса, како и користење роаминг, задржување на повик, активирање по исклучување и некои други услуги.

"Космофон" своите услуги ќе ги нуди во трите свои продавници (во Скопје, Тетово и Куманово), чиј број до крајот на годината ќе се зголеми на осум, како и на 113 други продажни места, а ваучерите ќе се продаваат на околу 2.000 продажни места.