Претставници на Македонската православна црква го осветија локалитетот Скупи. На присутните гости им се обрати и градоначалникот на скопската Општина Карпош, Стевчо Јакимовски, а раководителот на локалитетот Скупи, археологот Ленче Јованова - Алексиева, изрази надеж дека градоначалникот ќе продолжи да ги поддржува активностите на овој локалитет. На возобновувањето на античкиот театар - Скупи, настапи Културно-уметничкото друштво "Александар Македонски", а театарот "Скрб и утеха" изведе делови од претставите "Деноносии", "Зајдисонце" и "Леб и игри".

На манифестацијата беседи одржаа Паскал Камбуровски и Ангелина Маркус од Здружението за негување на древните традиции "Ксантика".

Македонците "Ксантика" ја празнувале како празник на пролетта, љубовта цвекињата и убавината. Во античко време била синоним за македонскиот идентитет. Според старомакедонските митолошки преданија, Ксантија била Божица на сите цвеќиња во градините, полињата и горите. Во неа, до последен здив, бил вљубен богот Македон. Но, откако злите сили на некои од боговите на Пантеонот ја претвориле Ксантија во цвеќе, кутриот Бог Македон, секоја пролет ја барал својата прва и незаборавна љубов низ сите ливади и полиња, кај сите бистри потоци и реки, во сите цветни градови, во својата омилена земја Македонија.

Градот Скопје е еден од ретките главни градови во светот кој недалеку од строгиот центар има антички театар, кој е најголем во Република Македонија. На територијата на нашата татковина досега има откриено четири антички театри (Стоби, Хераклеја, Лихнида и Скупи). Тоа е доказ за духовната поврзаност на театарот со нашите простори. Театарот во Македонија има традиција од најмалку 2500 Божји години. Тој е длабоко всаден во нашата културна традиција. Некогаш во Македонија театарот служел за верски прослави и свадби, како и за театарски претстави.

Инаку, на манифестацијата која беше под покровителство на градоначалникот на Општина Карпош и Музејот на град Скопје, присуствуваа значајни личности, љубители и истражувачи на македонската античка историја.