Според весникот "Факти", албанскиот премиер Фатос Нано го искарал Арбен Џафери за неговото однесување кога тој оцени дека не е можен соживотот со Македонците и опстанокот на мултиетничките држави. Премиерот Нано наспроти Џафери истакнал дека брзото спроведување на Рамковниот договор е еден од цврстите услови за цврст соживот и за стабилност и мир во регионот.

Владата во Тирана ја разгледува можноста на македонските граѓани да им се овозможи влегување во Албанија само со лични карти. Ова следувало по одлуката за укинување на визите за државјаните на Бугарија, Чешка, Унгарија, Полска, Романија, Словенија, Хрватска, Босна и Херцеговина, но не и за Македонија.

Македонското Министерство за надворешни работи се уште официјално не го разгледувало прашањето за либерализација на визниот режим. Ова прашање ќе почне да се разгледува откако министерката Илинка Митрева ќе се врати од Самитот на НАТО во Мадрид. Во МНР објаснуваат дека либерализацијата на визниот режим ни треба на сите, но додаваат дека таа не треба да се однесува само на земјите од регионот, туку и на Европа.

Триесет и осум илегалци биле откриени во полициска акција што била изведена на подрачјето на Гостивар. Сите илегалци се албански државјани, а се претпоставува дека се дел од криминалните банди кои во последниов период континуирано оперирале во Гостиварско и Тетовско.

Европската унија ги повика косовските Роми што се наоѓаат на граничниот премин Меџитлија на македонско-грчката граница, да ја прифатат понудата на македонската Влада и да пополнат барања за добивање бегалски статус. Владата, пак, најави дека против оние што нема да ја прифатат понудата ќе се постапи според меѓународните закони.

Во интервјуто за косовскиот весник "Коха диторе", албанскиот претседател Алфред Мојсиу изјавил дека за Албанците тешко дека постои друга опција освен независност на Косово. Според албанскиот претседател, независноста на Косово треба да помогне за натамошна интеграција на сите балкански држави, бидејќи Европската унија нема да ги прими во своите рамки државите кои со себе носат нерешени проблеми од кои можат да произлезат нови судири.

Најважните барања на државите од Западен Балкан што се упатени до Европската унија се однесуваат на зголемување на финансиската помош и на забрзување на процесот на интеграција на овој дел од европскиот континент кон ЕУ. Но, на сето ова Брисел засега е многу воздржан.

Министерот за животна средина и просторно планирање, Љубомир Јанев, на презентацијата на Киевскиот извештај за состојбата со животната средина во Европа одржана во Охрид, изјави дека Македонија предничи во однос на своите соседи во заштита на животната средина, но заостанува зад земјите од Централна Европа.

До Олимпијадата во Грција за јавна презентација треба да бидат подготвени античките градови Стоби кај Велес, Вардарски Рид кај Гевгелија и Исар кај валандовското село Марвинци. Археолози од Музејот на Македонија ќе обезбедат логистичка поддршка во истражувањата на овие три археолошки локалитети кои ги вршат Заводите за заштита.

Драмскиот театар со "Диво месо" од Горан Стефановски, во режија на Александар Поповски, гостуваше на Меѓународниот театарски фестивал "Варненско лето" во Бугарија. Гостувањето на "Диво месо" на "Варненско лето" е по гостувањето во Удине, Подгорица и Виена.