"Има настани и личности кои се посебно инспиративни за творештво. Со своето хумано и духовно дело Мајка Тереза го задолжи светот и засекогаш ќе биде предизвик за луѓето кои создаваат научни, истражувачки, културни, уметнички и други трајни вредности".

Трудот "Скопјанката Мајка Тереза" ги открива најзначајните настани поврзани со најмалку познатиот дел од животот на големата хуманистка, нејзините семејни корени, детство и младост, поминати во родниот град Скопје, оценува историчарот д-р Лазар Лазаров за делото за кое уште ќе констатира:

"Со димензионирањето на повеќегенерациското живеење на семејството Бојаџиу во Скопје, на јавноста & се открива можеби и суштината за емотивната поврзаност на Гонџа Бојаџиу со родниот град, која и самата ја дефинира со нејзината силна оценка и порака: 'Ако не беше Скопје, ќе ме немаше и мене, ќе ја немаше ни Мајка Тереза'".

Суштината и величината на хуманоста и длабоката духовна посветеност, се судбинските патокази низ животот кој Гонџа Бојаџиу го започна и на кој му се радуваше во Скопје. Затоа, расветлувањето и обработката на овој дел од нејзиниот живот, на најубав начин претставува комплетирање и прилог кон биографијата на Мајка Тереза.

Голема е привилегијата и суштествена е мотивацијата и инспирацијата, што е видливо и од самиот труд, кога авторот пишува за личност која ја познава, ја чувствува блиска и од чии дела и добрини и самиот творечки се напојува.

Со големината на своето универзално хумано дело, со благородната духовна и световна мисија, Мајка Тереза е богатство на нашата современост кое му припаѓа на човештвото и на цивилизациите. А секое битие, во својот живот, има само еден почеток и крај. Во Скопје, таа ја здогледа светлината на светов и од тука зачекори низ животот и со бескрајната љубов и Божја Молитва, го освои светот, останувајќи засекогаш "милостива мајка".

Оваа најнова творечка рожба на упорниот трагач и хроничар, пријател и почитувач на Мајка Тереза, е најубав дар за светов, посветен на жената која со своите дела за живот стана Светица, пишува рецензентот д-р Лазар Лазаров.

Тргнувајќи од своето големо научно, но и дипломатско искуство и богатство, проф. д-р Димитар Мирчев, високо вреднувајќи ја ова книга и посебно истакнувајќи ја силната темелност и професионалност на авторот, препорачувајќи ја книгата како значаен истражувачки труд, прави осврт кон духовната поврзаност во мисијата на неговата Светост Папата Јован Павле Втори и Мајка Тереза.

"Неговата Светост Јован Павле Втори говореше на јубилејното 50-то Генерално собрание на ООН, во1995 година во Њујорк. Говореше за слободата на човекот, за тоа како да го преземеме ризикот на слободата, солидарноста и мирот. Тој во таа прилика рече: 'Секое нешто што го редуцира човекот, секое нешто што ги скусува хоризонтите на човековиот стремеж кон добрина - ја повредува суштината на слободата. За да ја вратиме нашата надеж и нашата верба на крајот на ова столетие на тага, ние мораме повторно да го стекнеме видикот на оној ненадминлив хоризонт на можности кон кои се стреми човековиот дух'".

Нешто слично рече Папата и неодамна во приликата на бетификацијата на Мајка Тереза, посочувајќи го во неа духот што буди надеж и верба за човештвото во тоа минато столетие на тага... Прашање е дали тој дух и таа посветеност, за кои оние што страдаа и беа лишувани од храна, здравје, слобода и достоинство, да се поврати надежта и вербата & беа вродени доблести на Мајка Тереза, просветлени и облагородени со милосрдноста и служењето на Господ? Дали тие добродетели не беа плод и на семејството, родителско и роднинско продуховување и воспитување? А родниот град? Училиштето, во лето маалото, другарките? Еснафот, честа, граѓанското образование? Бојаџиу како да била овоплотување на тој космополитски и мултикултурен дух на Скопје на почетокот на "столетието на тагата", бележи професор Мирчев.

Угледниот македонски професор и член на многу меѓународни институции и академии, Димитар Мирчев, во инспиративната рецензија за книгата, најсоодветно ја искажува и љубовта и приврзаноста на авторот со несомнено најубавиот и најинспиративниот негов лик, Мајка Тереза, кој со се она што го направи (неколку книги, филм, многу интервјуа, записи, радио-драма) ја осветли најмалку познатата страница на нејзината биографија, истакнувајќи:

"Делото на Тренчевски не е обична хроника, не и ниту само биографија, најмалку пак е збирка на историски белешки и цртички за Мајка Тереза и нејзината поврзаност со родниот град, за семејството Бојаџиу, за Скопје во изминатиот век. Тоа е сето тоа заедно, но и повеќе: тоа е портрет на еден голем космополит, хуманист и следбеник Исусов, но и портрет на едно време, на еден отворен и космополитски град и народ.

Авторот овладеал со оригинален и исклучиво богат истражувачки материјал, во добар дел од примарни извори, така што прави една биографска, историографска и контекстуална синтеза каква што ретко сретнуваме во нашата публицистика и литература. Во таа синтеза, раскажувачкиот и литерарен не е ништо послаб од документаристичкиот аспект на делото".

Овој портрет на скопјанката Гонџа Бојаџиу, Мајка Тереза, би требало да се прочита во светот, во многу земји, култури и читателски кругови, констатира и препорачува академик Димитар Мирчев.

Книгата, која ја издаде фондацијата "Скопјанката Мајка Тереза" во рамките на подготовките за нејзинот прогласување Светица, ќе има изданија на 10 јазици, а скопската промоција се најавува за петти септември во МАНУ, на денот на нејзиното упокојување.