Македонците во Требишта и Мало Острени за првпат имаа можност да се сретнат со театар. Тие со голема љубопитност ги следаа чекорите на актерите и внимателно ги слушаа нивните говори.

Присутните гости беа изненадени од умешноста на актерите кои одлично ги одиграа своите улоги. Многу дечиња, кои немаат можност во училиштата во Голо Брдо - Република Албанија, да се образуваат на својот мајчин јазик, за првпат ги слушнаа имињата на Филип и Александар Македонски и дознаа какво значење имаат овие великани за македонската историја.

По завршувањето на претставите следеа громогласни аплаузи, а својата среќа Македонците од Требишта ја покажаа со македонско оро. Дружењето продолжи и со македонски песни. Тамошните Македонци проговорија за нивната судбина и за тоа дека имаат потреба од културен дом и културна размена со матичната земја.

Театарот "Скрб и утеха", барем засега, е единствениот македонски театар кој гостува кај Македонците во соседните земји и ја продолжува традицијата на Војдановиот "Скрб и утеха", односно културно да ги обединува Македонците во соседството и пошироко. Следното гостување на овој театар е предвидено во Лерин, по покана на Македонците од Егејска Македонија.

За целиот настан, односно за гостувањето на "Скрб и утеха" во Голо Брдо, екипа на МРТВ сними документарен филм во режија на Владе Денчов, а по сценарио на Тихомир Стојановски.