Меѓу активностите на Конференцијата се и преземање мерки за учество на Македонците на локалните, парламентарните и претседателските избори во Република Бугарија, а исто така и одржување на Втора национална конференција на Македонците во Република Бугарија. Учесниците на Конференцијата се подготвуваат и за одбележување на значајни датуми од македонската историја.

Учесниците на Првата национална конференција на Македонците во Република Бугарија, одржана во Ново Село, утврдија и Резолуција за унапредување на положбата и правата на Македонците во Република Бугарија. Меѓу позначајните активности предвидени во оваа Резолуција се: преземање мерки за заштита и спречување од уништување на македонското културно-историско наследство и споменците на културата на македонскиот народ во Бугарија; Формирање културна автономија на Македонците во Република Бугарија, посебно во делот на Пиринска Македонија; Организирање на попис на населението со меѓународен мониторинг и остварување на право во пописните листи да се стави и графата за етничката припадност, а во таа смисла, покрај другите, да биде и графата со етноминот Македонец; Помош од буџетите на Република Бугарија и Република Македонија за организирање на културни манифестации на Македонците во Бугарија; Избор на Македонци - пратеници во Парламентот на Република Бугарија; Право на слободно користење на македонските национални симболи на сите прослави, празници, спортски натпревари, манифестации и одбележувања; Право на враќање на одземените имоти во Република Бугарија и Република Грција во владение, сопственост и наследство на Македонците и право на праведен надомест на претрпена штета, односно изгубена добивка; Право на образование на македонски јазик во основното, средното и високото образование и создавање услови за остварување на тоа право; Отворање на основни училишта на македонски јазик во сите населени места во Република Бугарија каде што живеат Македонци; Итно изготвување на учебници за македонски јазик, историја, географија; Обезбедување програми на македонски јазик во државната радиотелевизија и на локалните државни телевизиски и радио-станици, отворање на локална радио-станица на македонски јазик во Благоевград итн.

Македонците на Конференција утврдија Резолуција за пописот на населението во Република Бугарија во која тие велат дека не ги прифаќаат пописните резултати за бројот на Македонците во Република Бугарија и бараат од меѓународната заедница, ООН, Советот на Европа, ОБСЕ и ЕУ да ја принудат Република Бугарија да организира попис со меѓународен мониторинг.

Во утврдената Резолуција за името на Македонија се вели дека Македонците во Република Бугарија нема никогаш да прифатат промена, додавки, придавки или повеќекратна употреба на името и целосно ја отфрлаат референцата ПЈРМ. Исто така, тие не ги прифаќаат разговорите за двојно или какво и да е друго име за Македонската православна црква.

На Конференцијата беше усвоена и Резолуција за политичко-безбедносната состојба во РМ и на Балканот. Во неа беше изразена загриженост за развојот на настаните и нарушувањето на безбедноста во Косово и Република Македонија, потоа целосно се отфрлаат сите облици на насилство, екстремизам и тероризам заради постигнување на политички цели. Од НАТО и од КФОР бараат да ја обезбедат границата меѓу Македонија и Србија во делот на Косово и да го спречат прелевањето на албанските вооружени групи од Косово во Македонија и да ги преземат сите мерки за нивно неутрализирање.

Македонците на Конференцијата изразија незадоволство од работата на македонскиот амбасадор во Бугарија во поглед на заштитата на положбата и правата на Македонците и побараа од Министерството за надворешни работи на РМ да преземе соодветни мерки во врска со овој проблем. Учесниците на Првата национална конференција на Македонците во Република Бугарија, односно пратениците на членките на Заедницата на Македонците во Бугарија на Првото заседание на собранието на Заедницата на Македонците во Бугарија, утврдија програма за одбележување на значајни датуми, настани и личности од македонското културно и историско наследство: 4 февруари - раѓањето на Гоце Делчев, 22 април - убиството на Јане Сандански на Роженскиот манастир, 4 мај - убиството на Гоце Делчев, 12 септември - Ден на геноцидот во пиринскиот дел на Македонија, 2 август - Ден на македонската државност, 10 август - Ден на македонското помирување и обединување.

На 24 и 25 август 2002 година во Скопје одржана е Прва балканска конференција на Македонците со исламска религија, на која присуствуваа Македонци со исламска вероисповед од Турција, Бугарија, Грција, Македонија, Албанија и Србија (Косово). На 28 март 2003 година извршено е обединување на Студентското друштво на Македонците од Албанија и Студентското друштво на Македонците од Република Бугарија "Пирин" во единствено Студентско друштво на Македонците од соседните земји на Република Македонија. Наскоро се очекува да се одржи Прва национална конференција на Македонците во Србија и Црна Гора на која треба да се формира Заедница на Македонците во Србија и Црна Гора и Прва национална конференција на Македонците во Република Турција на која треба да се формира Заедница на Македонците во Турција. Со тоа, заедници на Македонците ќе бидат формирани во Албанија, Бугарија, Србија и Црна Гора и Турција.