Оваа изложба е второ претставување, додека првото е реализирано на 12 јануари 2001 година во музичкото училиште "Тодор Скаловски" во Тетово каде што биле изложени 400 експонати.

Основната идејна замисла не е да покаже се што поседува сопственикот, туку да го прикаже народниот живот во минатото на луѓето од овие простори без разлика на нивната верска и етничка припадност.

Меѓу првите предмети во Музејот е и сликата на мајката на господинот Златев која е облечена во народна носија од Скопска Црна Гора. Токму за таа носија во 1939 година таа има добиено награда - слика на "Света Богородица со Христа" која за време на војната била оштетена, меѓутоа рамките од сликата се наоѓаат во Музејот.

Секој посетител има можност да се запознае со стари книги, прибор за пишување, со монети кои биле во оптек во минатото. Потоа прикажани се археолошки предмети како фибули, прстени, апликации, алки, орудија, оружје, кои потекнуваат од раната антика до доцниот среден век. Во Музејот се изложени и женски и машки накит како пафти, склопци, брошев и прстени, крстови, обетки итн. Обработката на металот како бакарот, месингот и цинкот е изложена во посебна целина како производи од казанџискиот занает - ѓумови, тепсии, вазни, ибрици, грниња, котлиња, ѓезвиња, тасови... од кои може да се види совршенството на изработката. Во ентериерот во градската куќа изложени се мангали, тагари кои служеле како носачи на жар за затоплување на просториите, потоа ковчези за чување на облека, ѕидни часовници, грамофони и огледала. Во еден ваков Музеј неизбежни се народните носии меѓу кои се женската носија од Долни Полог, како и делови од носии, чорапи и ткаенини. Сите се одликуваат со извонредни изведби и украсување со различни орнаменти. Најмалиот експонат е гумено гласачко топче, а наспроти него најголем експонат е бакарната софра. Најтежок предмет е рачна камена воденица за бунгур, додека најстари експонати се керамички фрагменти од садови - стари од 8.000 до 5.000 години пред Христа.

Најмалиот етнолошки музеј е збогатен и со ред други предмети кои "зборуваат" за животот на овие простори. Сите тие предмети се изработени од 30 видови на материјали во кои влегуваат среброто, алпак, месинг, алуминиум, олово, цинк, бакар, железо, керамика, дрво, хартија, платно.....

Господинот Симеон Златев - Моне со реализирањето на оваа изложба не застанува тука, туку тој и понатаму ќе продолжи со собирање на стари предмети, а постои желба и можност овој мал Музеј да биде прикажан и надвор од границите на Македонија.