Во Домот на културата "Марко Цепенков" во Прилеп во тек е изложбата "100 години Илинден на филм" што ја организира Кинотеката на Македонија, а на која се презентираат фотографии, документи, плакати, сценографски и костомографски скици од македонското филмско наследство во кое се третираат теми од Илинден.

Општинскиот комитет на ВМРО-ДПМНЕ повторно ја покрена иницијативата до Советот на Општината Дебар за изградба на споменик на македонскиот револуционер Гоце Делчев, а по повод 100 години од Илинденското востание.

Владата ќе организира курсеви за Албанците што ќе конкурираат за новите вработувања во јавната администрација. Обуката би траела една година, а би се одржувала на Факултетот за јавна администрација на Штуловиот универзитет во Тетово. Инаку, во јавната администрација би требало да се вработат околу 2.400 Албанци, според констатација на Муса Џафери.

Тетовскиот универзитет, дефинитивно го почна својот пат за легализација, а се очекува во наредната недела или најдоцна за две недели да биде регистриран во Заводот за статистика на Република Македонија како легална институција - пишува скопскиот весник на албански јазик "Факти". Ова се должи на претходно постигнатиот договор помеѓу Али Ахмети и ректорот на тетовскиот Универзитет, Неџбедин Беадини.

Проблемот со поставување на директор Албанец во ОУ "Кристијан Тодоровски - Карпош" во Умин Дол е решен. Пратеникот Иван Стоиљковиќ посредувал кај министерот Положани по што биле известени уминдолчани дека на функцијата останува стариот директор, додека не се избере нов, Македонец.

Државата мора да му помогне на "Бирлик" кој е единствен весник на Турската заедница во Македонија, констатираа учесниците на трибината под наслов "Има ли шанси за Бирлик?", која ја организираше Здружението за развој на медимите на турски јазик во Македонија. Според главниот и одговорен уредник на "Бирлик", Насер Идрис, тоа не е само весник, туку и издавачка куќа на турската заедница во чии рамки излегуваа две детски и едно литературно списание, како и книги од домашни автори.

Во Ротердам, Кралство Холандија, се формира Македонска заедница во која пристапија ситАе македонски клубови, православни црковни општини, спортски друштва, фондации, хуманитарни организации и други македонски организации коишто дејствуваат на целата територија на Холандија.

За претседател на Заедницата е избран Џон Тодоровски, македонски бизнисмен од Холандија, а потпретседател е Љупчо Ѓорчевски, актуелен претседател на здружението "Бели мугри" од Ротердам.

Во Домот на културата "Крсте Мисирков" во Свети Николе се одржа трибина "Методи Манев - 30 години творештво". По одржувањето на двете сесии на кои свое излагање имаа тринаесетина автори, беше промовиран и најновиот роман од Методи Манев - "Корени на животот, корени на смртта".

На 26 март во Културно-информативниот центар - Скопје се одржа годишно Собрание на Форумот за човековите права на Македонците од Егејскиот дел на Македонија. На собранието беше презентиран извештај за досегашната работа на Форумот, а присутните гости беа информирани за отворената Фондација за изградби на македонски православни цркви и културни домови во Егејскиот дел на Македонија. Форумот додели благодарници на активисти и донатори, а таква благодарница доби и нашиот неделник. Беа промовирани и книгите "Село Чифлиџик во Егејска Македонија" и "Непрежален роден крај" од авторите Никола Балканов и Ангел Балкански.