Директорката на оваа агенција, госпоѓа Лидија Трипуноска, и по седми пат ни откри дека и во Македонија има жени кои се успешни менаџерки и кои можат да се носат со сите потешкотии и предизвици кои оваа функција ги повлекува со себе. Жената има значајно место во сите сфери на живеењето и работењето. Тие исто така и во многу работи далеку се поуспешни од нивните ривали - мажите.

Лауреатките на оваа манифестација се избрани од фирми од целата држава, од различни области на стопанисување и тоа според одредени критериуми. Директорката Трипуноска, како и шесте години наназад, и минатата 2002 година трагаше по најуспешните жени менаџери.

Госпоѓа Егуменовска е првата жена која го скрши мразот и ги видоизмени димензиите на оваа манифестација. Таа претставува мост кој ги поврзува жените од Македонија со другите жени Македонки кои живеат и работат далеку од своето родно место. Со самото ова се отвораат и патиштата најнапред за размена на искуствата, а потоа и за соработката со нашите стопански субјекти во областа на деловни зделки меѓу тие земји и нашата Македонија.

Следните жени менаџерки се: госпоѓа Елисавета Јанева - Арсова, финансиски директор во модната конфекција "Герас Цунев" од Струмица, која придонесува особено во финансискиот дел, трговијата и пласманот на нивните производи. Сите обврски ги прави со голема желба и упорност кои на крај резултираат со успех. Потоа, госпоѓа Маја Ашкилова, генерален директор на студиото "МагнаСкен" од Скопје, која веќе осум години е на оваа функција. Нејзиниот успех се должи на големата истрајност, амбициозност, коректна и толерантна работа, но и разбирање со работниците. Покрај работните обврски, нејзина преокупација е и изработка на накит од глина. Кај неа секогаш постои подготвеност да одговори на сите барања се со цел клиентот секогаш да е задоволен. Следната лауреатка е госпоѓа Билјана Кабранова, генерален директор на фабриката "Македонија" а.д. од Неготино. Кај неа секогаш тлее желбата да се постигне многу повеќе од она што е постигнато. Токму тоа ја прави да биде успешна во надминувањето на проблемите кои секогаш ги има. Од друга страна, чесноста и упорноста на госпоѓа Билјана & помагаат во постигнувањето на позитивни резултати и квалитет на производите. Нејзина цел е фирмата која ја раководи да стане една од најуспешните со која ќе се освојуваат светските пазари. Една од жените менаџерки е и госпоѓа Лилјана Кимова, претседател на Управниот одбор на "Скопски саем" од Скопје. Како прв човек на оваа фирма, веднаш го прифаќа предизвикот да дејствува во преструктурирањето на саемската дејност, а пред се изградба на деловен центар со високи европски стандарди. За неа успехот може да се постигне само доколку се сака и се познава работата, но најважно е со својот стручен интегритет да одбиеш да учествуваш во сомнителни проекти без оглед колку пари носат тие. Госпоѓа Слободанка Николовска, извршен директор за производство и прашања со вработените на "Макстил" од Скопје, целиот свој работен стаж го поминува во скопската "Железарница". Секогаш настојува да формира креативно јадро, тим со кој ќе соработува и ќе гради взаемна доверба. За неа постои правилото дека секогаш треба да се оди напред и не признава дека постои нерешлив проблем, но пред да се прифати функцијата менаџер потребно е добро да се размисли. Госпоѓа Камелија Пиперевска е веќе десет години на функцијата генерален директор на "Гони - текс" од Скопје. Раководи со фирма која се занимава со увоз - извоз, производство, маркетинг и пласман на производи од текстил. Иако по професија е педагог, упорноста и желбата ја натерале госпоѓа Камелија да го прифати и да го засака овој бизнис и да постигнува резултати во него.