Иако оваа турнеја за неа беше доста напорна, таа тука не застанува, туку продолжува и натаму да ги полни салите во Швајцарија, да гостува во Бугарија, а постојат и најави повторно да замине за Австралија и Америка.

На покана и во организација на КУД "Јане Сандански" од Австралија, Сузана Спасовска и Петар Нечовски на шести октомври минатата година заминаа во оваа далечна земја. Според програмата на организаторот тие требало да одржат седум концерти, но поради големиот интерес македонската публика ја удостоиле со уште три.

Покрај десетте не замолија да одржиме уште три концерти, но бидејќи веќе имав закажано турнеја за Америка, за жал, моравме да ги откажеме, вели Спасовска. Се надевам дека во некој нареден период (веќе имаме покана за повторно гостување) ќе ги реализираме и тие три концерти. Турнејата ја започнавме со концерт во Перт којшто беше премногу успешен и посетен. Продолживме во Мелбурн, потоа во Сиднеј, Волонгонг и Квинбиен. Од организаторите, односно од КУД "Јане Сандански" од Мелбурн, премногу сме задоволни и јас и мојот колега Петар. Можам да кажам дека се тие прекрасни организатори, бидејќи во нашите турнеи многу важна работа е кој организатор е ангажиран затоа што тој треба да ги информира луѓето каде се ќе настапат и под кои услови. Која било светска ѕвезда да дојде ако организаторот не е како што треба ништо од концертот. Тоа им се случило на многу наши пејачи заради организаторот да им пропаднат концертите така што морам повторно да кажам дека ние сме премногу задоволни. Организацијата беше одлична така што и понатаму ќе продолжиме со нови соработки и турнеи.

Повеќето менаџери или организатори практикуваат да поканат по еден популарен пејач и еден кој допрва му претстои музичка кариера заради финансиската страна на организаторот. Но, овој пат организаторите направиле исклучок.

Бевме двајца популарни пејачи така што се знаеше уште од самиот почеток дека таа турнеја ќе биде успешна, додава Спасовска. Многупати сум била на турнеи со македонски пејачи, меѓутоа морам навистина да го издвојам Петар како исклучителен колега, голем професионалец и пријател. На повеќето концерти не следеше групата "Деспина" (со исклучок во Мелбурн) луѓе кои живеат и работат во Австралија. Целиот репертоар беше подготвен и морам да кажам дека на нашите концерти не се случуваа оние класични игранки, туку на нашите концерти имаше час и половина концертен дел каде што гостите ја следат програмата и можат со големо внимание да ги следат песните од своето место. Доколку се стане да се игра се губи концентрацијата и веќе луѓето не внимаваат што пејачот пее и како пее. Сакавме да има еден културен концертен дел и дури потоа да им овозможиме на сите тие луѓе кои навистина беа развеселени на крајот да заиграат наши ора. Зошто го потенцирам ова? Затоа што на секој пејач му е многу полесно да запее и луѓето да почнат веднаш да играат, бидејќи тука веќе не се гледа како пееш, што пееш итн., но концертниот дел е една одговорна работа и сметам дека сите треба така да настапуваат.

Сузана и Петар настапиле во македонската сала "Саншајн" во Мелбурн и новоотворената сала во Сиднеј "Ред роуз", во големи сали каде што може да се соберат поголем број Македонци. На нивните концерти во Австралија претежно присуствувала македонска публиката.

На задоволство на публиката Сузана им ги испеа песните "Стани Македонијо", "Гордо Македонија", "Земјо моја", "Стани сине", "Божја реч", а голем хит кај нив се и песните "Бомба" и "Џингрлака џикица".

Да напомнам дека на концертите имаше и многу млада публика, а тоа ме прави среќна. Тоа е почитување од тие млади луѓе не само кон мене, туку и кон земјата од каде потекнуваат, вели Спасовска. Неодамна бев и во Бугарија. Честопати сум гостинка таму, бидејќи и таму имам луѓе со кои соработувам, а со некои сум во преговори за некои нови проекти. Освен тоа моите видео спотови се бараат таму и се пуштаат на ТВ каналите. Македонската музика е толку убава што не е чудно што и луѓето таму сакаат да ја слушаат. Од друга страна моите спотови се професионално направени така што тие сакаат да гледаат квалитет, а не само голотија и комерцијални песни.

Покрај концертите во Австралија, Сузе национале работеше и на еден проект.

Концертите во Австралија и во која било друга земја каде што има Македонци се прават или петок, сабота или недела, додава Спасовска. Преостанатите денови луѓето работат, така што во текот на неделата имам слободни денови кои ги користам за разгледување на градот во кој се наоѓам, со запознавање на местата каде што живеат и работат нашите Македонци. Покрај прошетките и дружењата најдов време да направам и нешто друго. Идејата за договор за еден проект дојде сосем случајно, но ете се случи благодарение на моите видео-записи коишто ги видоа нашите Македонци. Но, се случи тие спотови да ги видат и луѓе кои се занимаваат со музика во Австралија и кога ги видоа се воодушевија и ме запрашаа зарем е можно во Македонија да се направи вакво нешто. Изразија желба и тие да направат нешто. Тоа се луѓе од поголеми студија и со нивна помош направивме еден проект, а за каков проект станува збор се уште не е дојден моментот да го промовирам така што ќе остане уште малку тајна. Соработував со многу луѓе меѓу кои беа и наши Македонци коишто си имаат свои студија и работат интензивно на материјали како со наши Македонци така и со Австралијани, со секој кој ќе посака да соработува со нив. Проектот е прескап, но ќе се види и зошто, а инаку тоа е за мене од нив еден скап подарок.