Во Музејот на Скопје беше отворена самостојна изложба на Марија Марковска. Таа се претстави со 35 слики работени во маслена техника во различни димензии.

Изложбата со дела од меѓународната Конопишка ликовна колонија која се одржа минатата година во Михајлово, Кавадаречко, беше отворена во Музејот на град Скопје. На неа се претставени триесетина дела од 18 учесници на колонијата, работени во комбинирана техника. Организатори на колонијата која се одржа по петти пат се Младинскиот совет на Кавадарци и галеријата "Реноар" од Скопје.

Младата дизајнерка на накит Билјана Клекачкоска неделава ќе го изложи својот накит на меѓународниот саем за подароци во Њујорк. Поканата за учество на саемот е од американската организација "Помош за уметници". Освен на саемот Клекачкоска ќе учествува и на обука за запознавање на американскиот пазар и тренд, секако со цел за идни продажни изложби на тие простори.

Најновата книга на Трајан Петровски "Озрачување на стварноста" беше промовирана во Друштвото на писателите на Македонија. Делото поднасловено со "Анадолски бденија и провиденија" се всушност записи на авторот од времето на неговиот дипломатски престој во Турција.

Во издание на "Студентски збор" излезе од печат стихозбирката на Борис Апостолов насловена како "Раздробување на зборот". Книгата содржи 43 песни.

Во театарот "Центар" беше промовирана најновата книга на Ристо Стефановски "Театарот во Македонија - современи тенденции", во издание на Македонскиот народен театар. Книгата ја промовираа Бранко Ставрев, Венко Андоновски и Георги Сталев. Оваа книга е трето продолжение од циклус "Театарот во Македонија" и го опфаќа периодот од 1958 до 1962 година.

Балетот на Народното позориште од Белград, гостуваше во Македонскиот народен театар со претставата "Доктор Џекил и Мистер Хајд" во кореографија и режија на Владимир Логунов.

Настапија првенците на белградскиот балет: Константин Костјуков, Константин Тешеа, Душка Градичевиќ и други.

По соработката со бугарски и украински автори, претставувајќи & ја на домашната публика богатата драматургија на овие земји, Народниот театар од Штип ја започнува соработката и со авторите од соседна Грција. Најновиот Проект ќе се реализира со ансамблот на оваа театарска куќа, а со чии проби се почнува и претставата "Тромбонот" од Мариос Пондикос, во режија на Петрос Панамос, двајцата гости од Грција.

Уметници на МНТ идниот месец ќе настапат на нивната сцена со "Порги и Бес". Гостувањето е голем настан за Балетот, зашто соработката беше прекината од повеќе причини и состојбите добија погрешен тек.

Поп-ѕвездата Тоше Проески на први февруари ќе настапи во Цирих, Швајцарија, а на 14 и 15 ќе се претстави и пред публиката во Берн. Еден ден подоцна ќе гостува на концертот на познатата југословенска ѕвезда Жељко Јоксимовиќ во Лондон, каде што ќе се сретне со тамошните композитори, кои ќе бидат вклучени во снимањето на неговиот нов албум на англиски јазик. Тоше ќе патува и во Мадрид каде што со композиторот Пампкин Долс ќе го финализира договорот за снимање дует со некоја од шпанските ѕвезди.

Премиерната проекција на првиот македонски 3Д-анимиран филм "Вљубениот Леви", снимен по сценарио и во режија на Орде Стеваноски, беше одржана во Музејот на современата уметност. Филмот не е подготвен за киноприкажување, но ќе биде емитуван на Националната телевизија.

Светска премиера "Вљубениот Леви" доживеа на филмскиот фестивал "ФИПА" во Биариц, Франција, каде што е во официјална конкуренција за кратки филмови меѓу 50 остварувања, од кои 13 се анимирани.