КУЛТУРА

Кате и "Нели ти реков" дванаесет години во водите на македонската музика

НЕ Е ЛЕСНО ДА ЖИВЕЕШ ОД ПЕСНА

Пишува: Милева ЛАЗОВА

  • Групата "Нели ти реков" поседува вокал кој може да се справи со секаков музички жанр.
  • Иако Кате никогаш не го школувала својот глас, сепак Македонија има пејач кој поседува божји дар.

Во градот на лозјата, Кавадарци, не може да се замисли ниедна трпеза без добро црвено вино и ракија. Сето тоа не е комплетно ако не се "залие" и со добра песна. Токму во овој град се родија и вистинските пејачи меѓу кои е и Катерина од групата "Нели ти реков". Нејзиниот милозвучен глас е пример за пеење без трошка фалш, глас со каков што ретко кој од македонските пејачи може да се пофали.

Уште во далечната 1990 година таа станува главен вокал на групата "Калипсо", име кое подоцна преминува во "Нели ти реков". Кате заедно со своите колеги редат успеси на фестивалите, снимија три касети, меѓутоа нивните обожаватели се уште се во очекување на нивното првенче, таканаречено CD.

ДОЛГОГОДИШНА КАРИЕРА

За причините не треба многу да се зборува затоа што веќе се познати - треба да се вложат многу финансиски средства до кои на денешно време тешко се доаѓа, па макар станувало збор и за пејач од калибарот на Кате.

Во последно време замре народната музика и не знаеме колку ќе ни се исплати сега да финансираме на нов проект, вели Кате. Меѓутоа, имаме зацртано една цел, а колку тоа ќе се реализира, ќе видиме. Сакаме да направиме едно дупло CD со сите наши најубави песни. Сега засега тоа ни е во план, но кога ќе се реализира се уште не се знае. Единствено знаеме дека ќе треба да вложиме големи финансиски средства. Сепак, не се откажуваме од таа идеја, а дури кај нас се јави и една желба, а таа е да се обидеме и на забавната сцена. Таа идеја ни ја наметнаа оние наши обожаватели кои ги следат нашите настапи во живо. Тие се на мислење дека повеќе ми "лежи" да пејам забавни мелодии.

Кате и "Нели ти реков" со придружниот вокал Дуле

Групата "Нели ти реков" постои од 1990 година, што значи функционираат веќе12 години. Всушност, нивната музичка кариера ја започнаа токму со забавните песни, меѓутоа тогаш не покажаа голем успех во тоа, зашто во времето кога се појавија беше на цена народната музика од која многу повеќе се заработуваше.

Со преминувањето од забавни мелодии на народни всушност ние го постигнавме нашиот успех, додава Кате. Иако сум повеќе наклонета кон забавната музика, сепак не сакам целосно да ја напуштам народната затоа што ја засакав и неа, особено старата македонска народна песна. Во последните две години сме со нов состав. Искрено да ви кажам се уште не знам која беше причината за поделбата на нашата група на уште една со исто име, но со друг вокал. Во тоа време поради мојата бременост не пеев редовно, така што и не сум замешана во причините на разединувањето на членовите и моите колеги со кои дотогаш работев. За мене беше тешко да одлучам во која половина да отидам, затоа што немаше некоја посебна причина. Но, се одлучив за оваа половина со која сметам дека одлично функционираме. Меѓутоа, постојат две групи со исто име што доведе до забуна кај луѓето. Затоа чувствувам потреба да им појаснам на луѓето дека се разликуваме така што пред името на нашата група го ставивме и моето име.

По ова подвојување групата ја сочинуваа тројца членови, но сега кон овој состав се приклучи и Дуле кој е пратечки вокал. Автори со кои соработува "Нели ти реков" од почетокот беа Глигор Копров, Дамир Имери, Кристијан Габровски, но сега претежно е застапен Сашо Ѓорѓиев, басист во групата.

ЗА ЕСТРАДАТА

Во почетокот групата која ја формиравме го носеше името "Калипсо", а во нејзиниот состав беше и сега познатиот пејач Мишко Крстевски, објаснува Кате. Идејата беше јас да се појавувам само на забавни фестивали, додека Мишко беше задолжен за народните. На Мишко името "Калипсо" не му одеше во спој со народното, па така тој ни даде предлог "Калипсо" да премине во "Нели ти реков" што беше прифатено и од преостанатите членови. Во почетокот додека се пробивме, немаше многу фестивали. Настапувавме на "Валандово", "Цветници" и "Охридски трубадури". Во тоа време беа само тие фестивали кои беа доволни во текот на една година. Потоа се намножија, но сега забележувам дека еден по еден како да замираат.

Кате од многуте фестивали го издвојува "Рос" фестивалот затоа што се разликува од другите, по тоа што нема награди, нема натпреварување.

За да се настапи на другите фестивали треба пејачот да се изложи на дополнителни трошоци - за гардероба, за песна, аранжман, музика - сето тоа се плаќа, објаснува Кате. Добро е да постојат повеќе фестивали по теркот на "Рос" фестивалот затоа што се отвора можност за откривање на млади таленти. Ги поддржувам фестивалите на кои се пее во живо. Кога станува збор за купувањето на наградите за нас пејачите е шпекулација затоа што никој со сигурност не може да го потврди тоа.

За квалитетот во естрадата можам да тврдам дека има поквалитетни пејачи на народни песни отколку на забавни. Тие можат да се избројат на прсти, додека на забавната сцена се појавија многу млади пејачи на кои не им е местото таму, додава Кате. Кај нив можеби повеќе преовладува желбата да се пропее отколку талентот. Го поздравувам обидот на Иво Јанковски од "Трето уво" и Дарко Димитров со реализирањето на Проектот "Pley" што им овозможија на многу млади луѓе да го покажат својот талент. Идејата е супер затоа што во Македонија има голем број млади таленти кои поради фактот дека немаат финансиски средства не можат да се пробијат во светот на музиката. Еден ваков проект треба да се реализира и во народната музика.

Кате и "Нели ти реков" имаат добиено голем број награди - награда од жири, награда од публика на "Тетовски фолк фест", за интерпретација... Имаат настапувано и надвор од Македонија - во Германија, во Австралија, во Канада. Меѓутоа, Кате не се радува многу на свирките надвор од Македонија, иако има повеќе заработувачка.

Сакам да пеам во Македонија. Порано можеше да се живее од музиката, но сега е малку потешко знаејќи ја ситуацијата во државава. Покрај немаштијата и војната што не снајде, на народот не му е до песна.


 

Gore

 

Copyright 2002 "МАКЕДОНСКО СОНЦЕ"