Собранието в петок ќе ја продолжи расправата по Предлог законот за употреба на знамињата на заедниците во Република Македонија.
Опозицијата жестоко го нападна владиниот предлог, оценувајќи го како предвремен, недоработен, закон кој ќе го наруши достоинството на етничките Македонци и суверенитетот на државата.
Во текот на расправата главните крититики се однесуваа на тоа дека предлогот не е во согласност со Рамковниот договор, иако претставува една од последните обрвски што треба да се исполнат. Освен тоа, истакнуваа речиси сите опозициски пратеници, тој е и противуставен, оти со истакнување на знамиња на други дражави, се дели суверенитот на Република Македонија.
Поради тоа, Владата прво требала да донесе закон за знамиња, па дури потоа закон за нивна употреба.
Пратеничките групи на ВМРО-ДПМНЕ и на ВМРО-Народна, побараа повлекување на предлогот и се изјаснија дека нема да гласаат за него, иако се бара т.н. бадинтерово мнозинство за негово донесување. Тоа значи дека законот може да се усвои со мнозинство од гласовите на пратениците, како и со мнозинство од гласовите на присутните пратеници на заедниците кои не се мнозинство.
Пратениците од владејачките Социјалемократски сојуз, Либерално демократската партија и Демократската унија за интеграција реагираа најчесто со реплики на излагањата на опозициските пратеници и со тврдења дека со новиот закон не се легализира ниту албанското знаме, ниту федерализацијата на Македонија.
Заменик-министерот за правда Субхи Јакупи, во образложението за предлогот за донесување на закон нагласи дека целта на одредбата е да создаде услови за слободно изразување на идентитетот на припадниците на заедниците во Република Македонија, преку употреба на свои симболи, како што е знамето.
Тој додаде дека законот, со кој заедниците ќе ги употребуваат своите симболи во јавниот, службениот и приватниот живот е заснован врз Рамковниот договор. Така, граѓаните од одредена заедница, која е мнозинство во општината, може да го истакне своето знаме пред објектите и органите на единицата на локалната самоуправа, со тоа што постојано треба да биде истакнато и знамето на Република Македонија.
Знамето можат да го истакнуваат и за време на празници на заедниците, при пречек и испраќање на претседателот на Република Македонија и претседателот и членови на Владата и при официјално доаѓање на претседател или премиер на странска држава, како и на суверен или овластен претставник на меѓународната заедница.
Благоја Голомеов, пратеник на Либерално-демократската партија предложи амандман со кој ќе се направи разлика меѓу државното знаме и знамето на заедниците. Државното треба да е поголемо по димензии и при истакнувањето да стои еден метар повиско од она на заедниците, со што јасно ќе се детерминира како симобил-носител на суверенитетот.
Блаже Стојановски од ВМРО-НП ја обвини албанската заедница оти не сака да го користи знамето само како белег на нивната заедница, туку како јавно покажување на албанската автономија во дел од Македонија.
Силвана Бонева од ВМРО-ДПМНЕ смета дека ако овој закон е дел од Рамковниот договор, тогаш и нејзината партија, како потписник, требала да биде консултирана.
Таа предложи знамето на етничката заедница во Македонија да има минимални измени со кои би се разликувало, од она на пример на државата Албанија. "Пратениците од парламентарното мнозинство треба да размислат зошто секаде во светот употребата на знамиња на туѓи држави се смета за повреда на суверенитетот, дотолку повеќе што во нашиот Устав пишува дека сувернитетот е неделив. Ќе се случи и на објектите на полицијата, општината и војската да се употребува знамето на Македонија и на Албанија, односно симбол на две држави. Затоа и ќе имаме делба на нашиот сувернитет", потенцира Бонева.
И Михајло Георгиевски од Земјоделската народна партија на Македонија нагласи дека неговата пратеничка група нема да го поддржи законот, оти со него на етничките Македонци ќе им се нанесе огромна штета.
Од името на владејачкиот СДСМ предлогот го бранеа Славица Станковска и Борис Кондарко.
Кондарко неколку пати повтори оти со новиот закон не се легализира ниту албанското знаме, ниту федерализацијата на Македонија.
"Дали кое било знаме ги предизвика случувањата во 2001 година. Најголемата демагогија е дека ќе се подели сувернитетот на државата. Дали кога Македонците го истакнуваат знамето во Австралија ние го имаме делот од тој сувернитет и дали Македонија го загрозува сувернитетот на ЕУ бидејќи во многу прилики го истакнуваме нејзиното знаме", праша Кондарко.
Станковска рече оти во современиот свет, симболите се фактор на обединување на сите граѓани, а Албанците имаат култ кон своето знаме, што не е лошо или спорно.
"Но, апсурдноста на која се повикуваат Албанците, е да го користат тоа знаме пред државното во средини во кои живеат над 50 отсто. Дали тоа не ги навредува другите Албанци, кои во неки општини се по неколкку процент, оти почитта и лојалноста не се изразуваат со проценти. Државните симболи не може да бидат еднакви со симболите на етничките заедници", истакна Станковска.