Македонската Влада го презентираше првиот Национален извештај за Милениумските развојни цели со што почнаа активности за поддршка на глобалните процеси што имаат цел да ја намалат сиромаштијата и нејзините бројни димензии до 2015 година.
Исполнувањата на Милениумските развојни цели до 2015 година во Македонија треба да го намали од 50 на 9,5 проценти учеството на населението кое живее под границата на сиромаштијата, а сите деца да бидат оспособени во целост да завршат основно и средно образование.
Според поставените цели, веќе до крајот на годинава треба да се елиминираат половите разлики во основното и средното образование, односно до 2015 година на сите степени на образование. До оваа година треба да се преполови и бројот на жените како неплатени работници во семејството и да се намали стапката на неактивност за една третина, а воедно да се удвои учеството на жените во власта.
Исполнувањата на развојните цели треба да придонесат во натамошно намалување на стапката на смртност кај доенчињата и децата под петгодишна возраст, за искоренување на сипаниците до 2015 година и намалување за три четвртини на стапката на смртност кај родилките.
Целите обврзуваат до 2015 година да се намали ширењето на ХИВ/СИДАТА и појавата на туберкулоза и други тешки болести.
Развојните цели предвидуваат и создавање поволна средина што ќе го стимулира влезот на странските директни инвестиции до седум проценти од БДП до 2015 година, како и заголемување на уделот на надворешната трговија на светските пазари до 16 проценти од БДП и намалување на трговскиот дефицит на 12 проценти од БДП.
"Достигнувањата на Милениумските развојни цели и преклучувањето на Македонија кон Европската унија се поврзани процеси и поради тоа треба да бидат хармонизирани", истакна премиерот Владо Бучковски најавувајќи дека како продолжување на активностите за Милениумските развојни цели Владата во соработка со УНДП ќе изготви социоекономска програма за периодот од 2006 до 2015 година.
Според него, првиот Национален извештај за Милениумските развојни цели е само уште еден чекор на патот на Македонија кон Европската унија.
Фроде Мауринг од УНДП смета дека за потребата од исполнување на овие цели говорат фактите дека Македонија се уште е меѓу земјите со највисока стапка на невработеност, дека дури 55 проценти од населението страда од различни облици на сиромаштија.
"Свеста за исполнувањата на Милениумските развојни цели треба да се претвори во конкретни дејствија, а тоа ќе се случи само со ангажман и консензус на сите надлежни ресори", препорача Мауринг.
Според професорот на Економскиот факултет во Скопје Таки Фити клучна улога во исполнувањето на овие цели ќе има Владата која треба да создаде услови за економски раст и развој.
"Меѓу другото, Владата треба да најде начини за зголемување на капиталните инвестиции во Буџетот, што поскоро да ги оспособи сопствените институции за ефекасно работење, да и се спротивстави на корупцијата што не зависи само од добрата легислатива, туку и од владината политичка волја и да го развива бизнис-секторот и медиумите", рече професорот Фити.
Националниот извештај за Милениумските развојни цели е обврска на Македонија од потпишувањето на Милениумската декларација во 2000 година како земја-членка на Обединетите нации.