Министерот за надворешни работи Илинка Митрева во Вашингтон се сретна со американскиот државен секретар Кондолиза Рајс и со потсекретарот за политички прашања во Стејт департментот Николас Барнс, со што ја почна работната посета на САД.
На средбата се разговараше за македонската интеграција во евро-атлантските структури, спорот околу употребата на уставното име со Грција и демаркацијата на северната граница, во делот кон Косово.
Митрева го нагласи задоволството што оваа работна посета се остварува во годината во која се одбележуваат десет години од воспоставувањето на дипломатските односи меѓу двете земји.
"Тоа се десет години на пријателство и соработка меѓу Македонија и САД, десет години партнерство и сестрана поддршка од страна на САД за интегрирањето на Република Македонија во европските и евро-атланските структури" рече Митрева.
Како што соопшти МНР, македонскиот министер за надворешни работи зборуваше за остварувањето на македонските стратегиски цели, членство во НАТО и Европската унија, при што ја подвлече одлучноста на Владата на Република Македонија за целосно исполнување на преземените реформски обврски. Таа истакна дека имплементацијата на Охридскиот Рамковен договор е во финална фаза, како и дека процесот на децентрализација ќе започне практично да се имплементира од 1 јули. Притоа, Митрева ги запозна своите соговорници со прогресот во реформите во правосудството, како и со аспекти на економската програма на Владата.
Шефот на македонската дипломатија нагласи дека нашата земја ќе продолжи со конструктивната политика и лидерската улога во развојот на регионалната соработка, насочена кон обезбедување долгорочна стабилност и просперитет на Балканот.
Таа ја потврди подготвеноста на Република Македонија да придонесе кон напорите на меѓународната заедница за затворање на сите отворени прашања на Балканот, вклучително и прашањето за статусот на Косово.
Во тој контекст, таа го подвлече ставот дека обележувањето на северната граница во делот на Косово треба да се изврши што е можно поскоро.
Во однос на надминување на разликата околу името со нашиот јужен сосед, Митрева ја повтори подготвеноста на Република Македонија да учествува во процесот во ОН на конструктивен начин, предлагајќи ја како решение двојната формула - употреба на нашето уставно име во меѓународната комуникација и изнаоѓање на соодветна формула за билатералната комуникација со Грција.
Државниот секретар Рајс изрази благодарност за учеството на Република Македонија во мировните мисии во Авганистан и Ирак оценувајќи го како вистински придонес кон зачувување на меѓународниот мир и безбедност. Таа ја реафирмира подршката на САД за нашето интегрирање во евро-атлантските структури, поздравувајќи го постигнатиот напредок во исполнувањето на стандардите за членство. Притоа, потенцираше дека Балканот и Македонија се интегрален дел од визијата на претседателот Буш за слободна и обединета Европа.
Потсекретарот Барнс подвлече дека нашата земја има водечка позиција во направените реформски зафати во регионот. Тој рече дека е извонредно важно Македонија да продолжи на својот реформски пат кој води кон целосното интегрирање во НАТО и ЕУ.
Барнс нагласи дека процесот на проширувањето на НАТО ќе продолжи, истакнувајќи дека со оглед на лидерската позиција во реформите и покажаната соработка со земјите од регионот, Македонија е сериозен кандидат за членство во следниот круг на проширување на Алијансата.
Тој го поздрави учеството во ИСАФ мисијата на НАТО во Авганистан и придонесот на македонските војници во меѓународната коалиција за борба против тероризмот во Ирак и ги оцени како операции, кои на практичен начин го потврдуваат капацитетот и подготвеноста на Република Македонија за членство во Северно-атланската Алијанса.
Шефицата на македонската дипломатија во изјавата за Гласот на Америка оцени дека би било стратешка грешка со несакани последици по патот на балканските земји, доколку процесот на проширување на ЕУ биде сопрен или одложен и дополни дека со таа оценка се согласуваат и САД. "Периодот на размислување или интроспекција низ кој што поминува Унијата по референдумите во Франција и Холандија, убедени сме дека не треба да се одрази врз темпото на проширувањето на Унијата", оцени Митрева.
Таа рече дека Рајс и Барнс на разговорите оцениле дека Македонија е на вистинската патека. "Македонија е земја која што, без какво било претерување може да се квалификува како успешна приказна во нашиот регион. Држава која што го следи својот реформски пат и придонесува за релаксација во регионалната соработка, а и преку својата лидерска улога за релаксација на севкупниот амбиент", истакна Митрева.
Таа дополни дека Македонија продолжува со исполнувањето на сите критериуми потребни за поканата за НАТО на наредниот самит. Но, исто така, продолжува и со подготовките за членство во ЕУ. "Ние продолжуваме да работиме онака како што сме си ја задале задачата и онака како што се очекува од нас. Во врска со тоа го очекуваме Мислењето од Европската Комисија во ноември и статусот кандидат во декември, како и датум за почеток на преговорите за членство во 2006 година", потенцира Митрева.
Македонскиот министер за надворешни работи ја продолжува својата работна посета на САД со серија средби со конгресмени и сенатори, ќе оствари средба со Џек Д. Крауч, заменик на советникот за национална безбедност на претседателот Буш, а ќе има и свое обраќање во Вудро Вилсон центарот за меѓународни студии.