|
ВО СКОПЈЕ САМИТ ЗА РАЗВОЈ НА
СОРАБОТКАТА НА ЗЕМЈИТЕ ОД ЈИЕ
Под покровителство на претседателот на Република Македонија Бранко
Црвенковски и еврокомесарот за проширување Оли Рен денеска во Скопје почнува
дводневниот "Самит за развој на соработката на земјите Југоисточна Европа".
Самитот е во организација на Институтот за европски прашања, Институтот за
Дунавскиот регион и Централна Европа и Турскиот совет за економски односи со
странство.
Кире Наумов, советник за економски прашања на претседателот Бранко
Црвенковски, на вчерашната прес-конференција истакна дека Самитот ќе
овозможи заедничка и конструктивна дебата за изнаоѓање конкретни начини и
можности за соработка и разој на регионот на ЈИЕ.
"Регионалната соработка, континуираното градење и инвестирање во
добрососедските односи на сите држави во регонот учеснички на овој Самит, се
основа за траен мир, безбедност и стабилност на државите во ЈИЕ, без што не
може да се очекува забрзан економски разој", истакна Наумов.
Според него, Самитот ќе даде придонес во подобрувањето на економската
соработка меѓу земјите во регионот, интензивирање на трговската размена и
искористување на предноста од традиционалната поврзаност и комплементарност
на економиите во регионот.
Основачот на Економскиот форум на Северна и Јужна Европа, познатиот турски
бизнисмен Шарик Тара, потенцираше дека во моментов регионот на ЈИЕ се
соочува со два главни проблема. Првиот е прашањето на етничката и верската
разноликост, односно овозможување на непречено и рамноправно опстојување на
различните етникуми и религии, а вториот е економскиот развој.
"Во ЈИЕ постојат околу 40 национални етникуми. Сметам дека треба да се стави
крај на конфликтите, а тој проблем можеме да го решиме само со
воспоставување успешна демократија и со толеранција, што подразбира
рамноправност на сите кои живеат на Балканот", рече Тара.
Тој потенцира дека со оглед на тоа дека една од стратешките определби на
земјите од ЈИЕ е интеграцијата во ЕУ, потребно е државите од овој регион да
преземат соодветни чекори за достигнување на економското ниво на земјите од
Унијата. Во моментов, според Тара, земјите од ЈИЕ достигнале само една
десетина од економското ниво на ЕУ.
Тара истакна дека економските проблеми со кои се соочува регионот не можат
да се решат само со кредити и заеми од меѓународните финансиски институции,
како што се Светската банка и Меѓународниот монетарен фонд.
"Единствено решение според мене во оваа насока е економска интеграција на
регионот, во што секако треба да имаме поддршка и од меѓународната
заедница", додаде турскиот бизнисмен, изразувајќи надеж дека Самитот ќе даде
своевиден придонес во тој поглед.
Волфганф Рул од Институтот за европски прашања нагласи дека дводневниот
самит ќе даде придонес за зајакнување на политичката и економската соработка
меѓу земјите од регионот.
Рул дополни дека учесниците на дводневниот форум ќе отворат дискусии и за
реализација на повеќе проекти во инсфраструкурата, односно во сферите на
енергетиката, изградба на патишта, железниците, телекомуникациите и слично.
Околу 150 претседатели на држави или влади, високи државни претставници,
како и бројни претставници на бизнисот во Европа на дводневниот самит ќе
разменат мислење за преземање соодветни мерки за поддршка на мирот и
стабилноста, функционирање на демократијата и за конкретните чекори за
остварување на забрзан економски развој на регионот.
Во тој контекст се очекува од Самитот да произлезат насоките за зголемување
на инвестициите преку остварување на неопходните услови за слободна пазарна
економија, заштита на странските директни инвестиции, минимизирање на
бирократијата и заштита од корупција. Од самитот се очекува и да се зајакнат
соработката на земјите на регионот за поефикасна конкурентност на светските
пазари, со приоритет на инфраструктурното поврзување на државите од ЈИЕ со
другите региони во Европа.
Самитот ќе го отвори Јирген Грамке, претседател на Институтот за европски
работи и поранешен германски министер, додека во име на еврокомесарот Оли
Рен ќе присуствува генералниот директор за проширување на ЕК Фабрицио
Барбазо.
На Самитот ќе учествуваат претседателите на Бугарија и Србија, Георги
Прванов и Борис Тадиќ, албанскиот премиер Фатос Нано, премиерот на Црна Гора
Мило Ѓукановиќ, поранешниот претседател на Еврокомисијата Жак Сантер, шефот
на УНМИК Сорен Јесен Петерсен, поранешниот шведски премиер Карл Билд,
потпретседателот на српската Влада Мирољуб Лабус, бизнисменот Богољуб Кариќ,
поранешниот премиер на Италија Џулијано Амато, поранешниот претседател на
Светска банка и екс турски министер за економија Кемал Дервиш и
заменик-директорот на Европска банка за обнова и развој Сју Берет.
Освен претседателот Црвенковски како покровител, од македонска страна ќе
учествуваат и премиерот Владо Бучковски, министерот за економија Фатмир
Бесими, за финансии Никола Поповски и за екологија Зоран Шапуриќ.
|
|