ИЛИНКА МИТРЕВА: ФИНСКА ПРЕТСТАВУВА ПРИМЕР ЗА МАКЕДОНИЈА

Македонскиот министер за надворешни работи Илинка Митрева, на првиот ден од официјална посета на Република Финска, вчера се сретна со шефот на финската дипломатија Ерки Туомиоја, со потпретседателот на финскиот Парламент Марку Коски, со претседавачот на Високиот комитет за финскиот Парламент Јари Вилен и со претседавачот на комитет за надворешни работи Лиса Јаконсари.
На средбата Митрева нагласи дека Македонија стабилно чекори кон исполнувањето на критериумите од Копенхаген, како единствен предуслов за членство во Европската унија, додавајќи дека Владата е целосно определена да ја реализира агендата на која сите точки почнуваат со зборот реформи, соопшти кабинетот на министерката.
Митрева истакна дека не е случајно што првата дестинација по историскиот чин во доближувањето на Македонија кон Обединета Европа е токму Финска.
"Затоа што Финска, високо почитувана членка на ЕУ, претставува пример за Македонија. Затоа што Финска е наш искрен пријател и затоа што и евро-комесарот за проширување, Финецот Оли Рен е голем пријател на Македонија", рече Митрева.
По средбата со Туомија шефот на македонсата дипломатија информира дека една од централните теми на разговар била економијата, затоа што амбицијата на македонската Влада е земјата да стане и успешна економска приказна. Според неа, сега е вистинско време да се инвестира во Македонија, а тоа е и пораката што ќе биде пренесена на денешната презентација на потенцијалите на македонското стопанство пред бизнисмените во ФИНПРО.
"Оваа година е клучна за процесот на европска интеграција на Република Македонија. Очекуваме позитивното Мислење од Европската Комисија да го добиеме оваа есен, за што поткрепа и охрабрување се и изјавите на комесарот Оли Рен. Очекуваме позитивното мислење да биде основа за донесување одлука за стекнување статус на земја-кандидат за членство на декемврискиот самит на ЕУ и добивање на датум за отпочнување на преговори", истакна Митрева.
Финскиот министер за надворешни работи на средбата со Митрева го поздрави напредокот што го прави нашата земја во достигнувањето на критериумите кон придружувањето кон европското семејство. Тој рече дека Финска е подготвена да помогне со своите искуства во евро-интегрирањето, но исто така и во зголемување на економскиот развој. Туомиоја истакна дека е добро што Македонија го избра вистинскиот пат до евроинтегрирањето, а тоа е реализирањето на агендата на Владата за реформи во судството, борбата против организираниот криминал и корупцијата.
На средбата со потпретседателот на финскиот Парламент Марку Коски, тој го поздрави големиот напредок на Република Македонија во последите три години.
"Македонија стана партнер со кредибилитет и доверба", истакна тој.
Парламентарната соработка беше главна тема на разговорот на Митрева со Јари Вилен, претседавач на Високиот комитет за финскиот Парламент. При тоа Вилен најави уште поинтензивна соработка меѓу двата законодавни дома. Тој рече дека оваа пролет или есен делегација која тој ќе ја предводи ќе ја посети Република Македонија.
На средбата на Митрева со Лиса Јаконсари, претседавач на комитет за надворешни работи, македонскиот министер зборуваше за надворешно политичките приоритети на Македонија.