ИНТЕГРАЦИЈАТА ВО ЕУ И НАТО, ЕКОНОМСКИОТ РАЗВОЈ И РАМКОВНИОТ ДОГОВОР - ПРИОРИТЕТИ НА НОВАТА ВЛАДА

Клучни приоритети на Владата во наредните две години ќе бидат забрзување на процесот на интегрирање во НАТО и во ЕУ, интензивирање на економскиот развој, реформа на правосудниот систем, борба против организираниот криминал и корупцијата и доследно спроведување на Рамковниот договор, нагласи мандатарот Владо Бучковски во образложението на програмата и составот на идниот владин кабинет пред пратениците во македонското Собрание.
Владата што ја предлагам, истакна Бучковски, нуди јасен концепт за иднината на земјата и за нејзиниот развој, но е свесна за тешкотиите со кои се соочува Република Македонија и сите наши граѓани.
"Оваа Влада ветува дека во овој мандат, во 2006-тата година, Македонија ќе добие покана за членство во НАТО. Ветува дека до крајот на нејзиниот мандат, нашите граѓани - студенти, туристи, бизнисмени, ќе можат слободно да патуваат во европските земји, без да се судираат со тешкиот шенгенски визен режим. Оваа Влада ветува дека до крајот на нејзиниот мандат, Македонија ќе добие статус на земја кандидат за членство ЕУ и дека ќе ги почне преговорите за полноправно членство во Унијата", рече Бучковски.
Тој очекува во мандатот на идната Влада, што ќе се формира по следните парламентарни избори Македонија да добие и покана за членство во Унијата.
"Оваа Влада ветува дека ќе ја спроведе долгоочекуваната реформа на правосудниот систем, со која тој ќе стане поефикасен и со што истовремено ќе се овозможи поголема сигурност на компаниите при инвестирањето, што е клучно за развојот на нашата економија", истакна мандатарот Бучковски.
Тој вети дека Владата што ќе ја води ќе биде отворена за дијалог со стопанствениците и нивните комори, со опозицијата, со експертите и со сите луѓе со добра волја кои сакаат да дадат конструктивен придонес во побрз развој на општеството.
"Денес нашите луѓе мака мачат да обезбедат елементарна егзистенција, да ги платат сметките и да ги школуваат своите деца. Денес решавањето на меѓуетничките прашања и исцрпувачките, но јалови политички борби ни одземаат толку многу време и енергија што не можеме да се посветиме на решавање на реалните проблеми што го притискаат народот. Денес бедата и неслогата ни ја нагризуваат надежта. Тоа мора да престане. Сега е време за нов почеток, за нови идеи и за нова визија за Македонија. Сега е време да поверуваме дека можеме и повеќе и подобро. Сега е време да ги обединиме сопствените сили, енергија, моќ и знаење", нагласи мандатарот Владо Бучковски во своето експозе пред пратениците во македонското Собрание.
Бучковски вети дека Владата доследно ќе ги брани и почитува принципите врз кои е основана Република Македонија како самостојна и суверена држава, а работата ќе ја темели врз почитувањето на демократијата, владеењето на правото, гаранцијата на човековите права и слободи.
Новиот владин кабинет треба да го сочинуваат 19 члена. Мандатарот Владо Бучковски за министер за одбрана го предложи Јован Манасиевски, за внатрешни работи Љубомир Михајловски, за правда Мери Младеновска-Ѓорѓиевска и за надворешни работи Илинка Митрева.
За министер кој ќе раководи со финансиите предложен е Никола Поповски, за економија Фатмир Бесими, за земјоделство, шумарство и водостопанство Садула Дураку, за здравство Владимир Димов и за образование и наука Азиз Положани.
Како министер за труд и социјална политика предложен е Стевчо Јакимовски, за локална самоуправа Ризван Сулејмани, за култура Благој Стефановски и за животна средина и просторно планирање Зоран Шапуриќ.
Џемали Мехази е предложен за министер за транспорт и врски.
Бучковски за министри без ресор ги предложи Радмила Шеќеринска, Муса Џафери, Минчо Јорданов и Владо Поповски.
Владата ќе се смета за избрана ако за неа гласа мнозинството од вкупниот број пратеници.