АЛ ЏЕЗИРА: УБИЕНИ ДВАЈЦА МАКЕДОНСКИ ЗАЛОЖНИЦИ ВО ИРАК

Бунтовничката група Исламска армија на Ирак убила двајца македонски заложници поради "шпионирање во корист на американските сили", јави арапската телевизија Ал Џезира.
Исламската армија на Ирак во соопштението објавено на видео записот доставен до Ал Џезира, вели дека припадниците на нивните безбедносни сили ги уапсиле двајцата Македонци во моментот кога напуштале американски база во Ирак.
"По испрашувањето на двете лица и документите кои кај нив биле пронајдени било утврдено дека шпионираат за американските сили", се вели во соопштението.
На видеозаписот се прикажани Зоран Наскоски и Далибор Лазаревски, двајца од тројцата Македонци кои беа грабнати во близна на Багдад на 21 август.
Тројцата кумановчани, Далибор Лазаревски, Драган Марковиќ и Зоран Наскоски, кои заминаа во Ирак на 3-ти август каде што работеа за американската компанија "Соуфан инженеринг", на денот на нивното исчезнување биле дел од колоната од две возила што на пат кон Багдад била нападната од вооружени неидентификувани лица.
Досега ниедна ирачка група не се огласи со барање за откуп.
Експертскиот тим предводен од заменик-министерот за надворешни работи Фуад Хасановиќ, во кој се и претставници на МВР и Агенцијата за разузнавање, денеска во Катар треба да оствари контакт со катарските власти за да се провери веродостојноста на снимката што ја емитуваше телевизијата Ал Џезира и наводното постоење на снимка од егзекуцијата на двајцата Македонци.
Како што претходно најави МНР, во Македонија денеска со специјален лет од Ирак треба да се вратат 19 македонски работници.
 

ЦАРИНАТА ОДГОВОРИЛА НА ПОВЕЌЕТО ПРАШАЊА ОД НЕЈЗИНА НАДЛЕЖНОСТ ОД ПРАШАЛНИКОТ НА ЕУ

Царинската управа досега одговорила 80 отсто од прашањата содржни во Прашалникот на Европската комисија, што се однесуваат на нејзиното работење. Некои од нив се конечни, а дел треба да се доформулираат, информира денеска Секторот за евроинтеграции на Владата на Македонија.
Царината е одговорна за Поглавјето 25 што се однесува на Царинската унија и генерално, треба да каже дали има легислатива и административен капацитет за контрола на границите кои во моментот на зачленувањето ќе станат надворешни граници на Унијата кон трети земји.
"Оваа област ја регулираат вкупно 26 прашања поделени во три групи. Првата и најголема, се однесува на царинското законодавство, втората го покажува степенот на обученост на царинските работници, а третата ја дефинира размената на информации меѓу царинските испостави", изјави Златко Ветеровски, координатотор на работниот тим за одговарање на прашањата во Царинската управа.
Според него, прашањата се оценка за вкупното работење на Управата во текот на изминатите 12 години.
Управата, покрај прашањата од поглавјето 25, треба да одговори и уште неколку од други поглавја, директно поврзани со царината.
Работниот тим на Царинската управа задолжен за Прашалникот го сочинуваат 25 лица, но во него се вклучени и вработените од конкретните служби.
На прашањето за очекувани потешкотии во трговијата со заедницата, Управата одговорила дека Македонија се уште не е вклучена во Паневропската кумулација за потекло, иако таква политичка одлука е донесена на ланскиот Самит во Солун, а дефинираните услови се исполнети.