Министерот Спасовски се сретна со иранскиот амбасадор Карими

Министерот за внатрешни работи Оливер Спасовски денеска во Скопје имаше работна средба со амбасадорот на Исламска Република Иран во Република Македонија, Хосеин Карими.

На средбата, информираат од МВР, амбасадорот Карими му го честита изборот на министерот Спасовски и му посака успешна работа. Тој му честита на министерот Спасовски и за добро завршената работа на македонската полиција при организацијата на натпреварот од Супер купот на УЕФА. Амбасадорот Карими ја потенцираше подготвеноста на Исламската Република Иран за зголемување на соработката меѓу двете земји.

Министерот Спасовски се заблагодари на честитките и потенцира дека добро завршената работа и покажаната професионалност при организацијата на Супер купот е еден од сегментите кои ќе помогнат македонската полиција да ја врати довербата кај граѓаните, која беше изгубена во претходниот период. Тој искажа подготвеност за зголемување на соработката со Исламската Република Иран, пред се во надминување на проблемите со мигрантите, како и проблемите со тероризмот и исламскиот радикализам.